Вчера во Рим на 56-годишна возраст почина Микеле де Анџелис (Michéle De Angelis), италијански филмски продуцент, режисер и сценарист. Де Анџелис имаше и македонска адреса на работа и живеење (сопругата Наташа е Македонка од Битола) и активно учествуваше и реализираше неколку филмски проекти и во Македонија.
Роден на 19.09.1965 година во Рим, Де Анџелис уште како тинејџер бил фасциниран со подвижните слики, собирајќи делови од 35 мм ленти од омилените филмови и посетувајќи ги предавањата за креирање филмско сценарио на кои предавале некои од најголемите мајстори на италијанската кинематографија.
По дипломирањето на Правниот факултет, неколку години работел на продукција на играни филмови, ТВ емисии, реклами и документарни филмови како прв асистент на режија, менаџер на продукција, извршен продуцент и сценарист. Листата на авторите со кои соработувал е богата: Лучио Фулчи, Бернардино Ѕапони, Руџеро Деодато, Роландо Стефанели, Микеле Плачидо, Бад Спенсер, Дарио Арџенто, Ламберто Бава (Lucio Fulci, Bernardino Zapponi, Ruggero Deodato, Rolando Stefanelli, Michele Placido, Bud Spencer, Dario Argento, Lamberto Bava) и многу други.
Магистрирал на Универзитетот за визуелни уметности UCLA во Лос Анџелес, САД, а специјализирал сценарио на Coop Cinema Democratico во Италија. Потоа станува партнер во продукциската компанија „Alan Young Pictures“, работејќи во разни фази на финансирање и продукција на високопрофилирани филмски проекти, меѓу кои и филомовите на Лар фон Трир, ДОГВИЛ (Dogvill) со Никол Кидман во главната улога, и МАНДЕРЛЕЈ (Manderlay).
Во 2013 го снима неговиот прв краткометражен игран филм ВРАТИ (Doors), кој има богат фестивалски успех, учествувајќи на триесеттина филмски фестивали во светот и освојувајќи награди во Германија и Солт Лејк Сити, САД.
Во 2015 година неговиот краток филм ЧОВЕКОТ ВО ФИЛМСКАТА КАМЕРА (L’uomo nella macchina da presa / The Man In The Movie Camera) доби поддршка од Агенцијата за филм на Македонија и италијанскиот филмски фонд Film Commission Torino Piemont. Невообичаениот авторски пристап на Де Анџелис во овој металингвистички трилер за историјата на филмот имаше успешна дистрибуција и во САД. ЧОВЕКОТ ВО ФИЛМСКАТА КАМЕРА беше студија на случај (case study) на Меѓународниот филмски фестивал на кинематограферите „Браќа Манаки“ во Битола и „Џифони“ во Скопје.
Неодамна го заврши снимањето и постпродукцијата на краткиот игран филм „14“, психолошки трилер базиран на вистинска приказна за сериски убиец, снимен за време на пандемијата со ковид-19. За крајот на октомври беше планирано неговото учество на годинешното издание на КИНЕНОВА, фестивалот на дебитантски филмови, како член на жирито.
